കാവ്യലയം

ഏഴു കവിതകള്‍,  കാവ്യലയം എന്ന പേരില്‍ ശബ്ദലേഖനം ചെയ്തു് ഇവിടെ (http://www.archive.org/details/KavyaLayam) കൊടുത്തിരിക്കുന്നു.

പട്ടിക ചുവടെ..

Files	Pdf	odt	VBR MP3	Ogg Vorbis
എന്നെ അറിയുമോ? (Enne aRiyumo)	34 kb	21 kb	4.9 MB	4.9 MB
സ്വാതന്ത്ര്യം (Swathanthryam)	31 kb	21 kb	4.6 MB	4.5 MB
ചൈതന്യം (Chaithanyam)	29 kb	19 kb	3.6 MB	3.4 MB
കൈയ്യേറ്റം (KaiyyEttam)	39 kb	24 kb	9.2 MB	8.8 MB
അധിനിവേശം (Adhinivesam)	32 kb	22 kb	4.2 MB	4 MB
കൂട്ടുകാരന്‍ (Kuuttukaaran)	34 kb	19 kb	6.5 MB	6.1 MB
സംഗീതം(Sangeetham)	28 kb	22 kb	5.4 MB	5.3 MB

ഭൂമിയുടെ വിലാപം

എന്‍പൊന്നു മക്കളേ…
വാത്സല്യ വര്‍ഷം ചുരന്നൊഴുകീടുമാ
ജീവജലത്തിന്റെ അമ്മിഞ്ഞപ്പാലിലൂടെന്‍
ജീവരക്തം വലിച്ചൂറ്റിയിട്ടിന്നു്
വിഷലിപ്തമാക്കി വിതരണം ചെയ്യുന്നു
പൂതനയാക്കുന്നു പെറ്റമ്മയേ തന്നെ
ലാഭാര്‍ത്തി മൂത്തൊരാ ഘോര നൃശംസത
പുഴകളായൊഴുകുന്നൊരെന്‍ ജീവനാടിയില്‍
കുത്തിക്കുഴിച്ചും, കിളച്ചും, മണല്‍കോരിയും,
എന്‍ രക്തധമനികള്‍ മുറിച്ചും,
എന്റെ ജഡമുടിക്കാടുകള്‍ പറിച്ചും,
പിഞ്ചു ജൈവ വൈവിധ്യം മുടിച്ചും,
കാരിരുമ്പിന്റെ കരത്തിനാല്‍
എന്റെ ദേഹമാം കുന്നുകള്‍ തുരന്നും,
ഇനി ജനിക്കേണ്ടുന്ന തലമുറയ്ക്കായുള്ള
വിത്തെടുത്തുണ്ണുന്നു, പ്രാണന്‍ മുടക്കുന്നു
പ്ലാസ്റ്റിക്കിനാല്‍ എന്നെ മുഖപടം ചാര്‍ത്തിച്ചു്,
മരണ ശയ്യാവലംബ ആക്കുന്നതറിയുന്നുവോ നിങ്ങള്‍ ?
തടയുക, തകര്‍ക്കുക, കുലം മുടിച്ചീടുമീ
അന്ധകാരത്തിന്റെ ആത്മമിത്രങ്ങളേ തടയുക
ക്ഷമയരുത് മക്കളേ അമ്മയോളം ക്ഷമ!

pdf version: PDF
odt version: ODT

സംഗീതം

നാദസ്വരൂപിണി വാക്ദേവതയുടെ
താളശ്രുതിലയ സമ്മേളിതമാം
നടന ചുവടില്‍ പാദസരത്തിന്‍ നിസ്വനമായി,
ലാസ്യ വിലാസിത ഭാവതലത്തിന്‍
തരളിത ഹൃദയ മനോരഥമേറി,
മാനസ മാസ്മര വിസ്മയമായി
ഒഴുകും സംഗീതാമൃതധാര

ആനന്ദാമൃത ലഹരിയില്‍ മുങ്ങി
പ്രപഞ്ച താളലയശ്രുതി മീട്ടീ
കാറ്റില്‍ മഞ്ഞില്‍ മഴയില്‍ പുഴയില്‍‌
കുയിലിന്‍ പാട്ടില്‍ വെണ്‍‌നുരചിന്തും തിരയില്‍
മാമലമുകളില്‍ മൌനത്തില്‍
നിര്‍മ്മല നിരുപമ നിര്‍വ്വാണ സുഖം
നാദബ്രഹ്മലയം സംഗീതം

pdf version: PDF
odt version: ODT
OGG version: OGG

കൂട്ടുകാരന്‍

ഓര്‍ത്തുപോയീ എന്റെ കൂട്ടുകാരാ,
നമ്മള്‍ ആശാന്‍ കളരിയില്‍
ഒന്നിച്ചുപോയൊരാ ബാല്യകാലത്തിന്റെ
സ്നിഗ്ദ്ധസ്വപ്നങ്ങളേ ഓര്‍ത്തുപോയി.
അന്നൊന്നുമാ പിഞ്ചുബാല്ല്യസ്വപ്നങ്ങളില്‍,
ഞാനെന്ന ഭാരം കനം വെച്ചിരുന്നില്ല
നമ്മളൊന്നിച്ചന്നു് ആടിനേ മേച്ചതും,
അമ്പലച്ചിറയിലും കാവിലെ തോട്ടിലും
ചാടിത്തിമിര്‍ത്തതും, ഊളിയിട്ടീടുമ്പൊള്‍
കൈ കൈതമുള്ളാല്‍ മുറിഞ്ഞതും ഓര്‍ത്തുപോയി
അല്പരസങ്ങള്‍ പിണക്കങ്ങള്‍
പിന്നെ മദ്ധ്യസ്ഥരില്ലാത്ത അനുരഞ്ജനത്തിന്റെ
ആശ്ലേഷഹര്‍ഷങ്ങള്‍ ഓര്‍ത്തുപോയി

എനിക്കെന്തു ലാഭമെന്നോര്‍ക്കാതെ
മാനുഷര്‍ മന്ദസ്മിതത്തിന്റെ പൂച്ചെണ്ടു തന്നതും,
എന്റെ ദുഖങ്ങള്‍ നിന്‍ നിറകണ്ണിലൊഴുകുന്ന
പുഴയായി ഒലിച്ചു പോകുന്നതും,
ഒരു തുണ്ടു കയറിനാല്‍ തൂക്കിനിര്‍ത്തിടാതെ
നെടുവീര്‍പ്പിടുന്നതും ഓര്‍ത്തുപോയി

സ്നേഹോഷ്മള ഗാഢബന്ധത്തിന്‍ നൂലിനാല്‍
പാരസ്പര്യത്തിന്റെ പൂമാല കോര്‍ത്തതും
ഓര്‍ത്തുപോകുന്നു ഞാന്‍ എന്‍ നഷ്ടബാല്ല്യമേ,
ഇനിയും വരില്ലേ എന്‍ കൂട്ടുകാരാ

pdf version: PDF
odt version: ODT
OGG version: OGG

അധിനിവേശം

അധിനിവേശത്തിന്റെ വേരിളക്കീ,
അഹങ്കാരത്തിന്റഴുക്കു് പറ്റി
അഴുക്കിന്റൊഴുക്കു നിലയ്ക്കുമിപ്പോള്‍,
ആറടി മണ്ണിലൊലിച്ചിറങ്ങും.
കാലപ്രവാഹത്തിലുരഞ്ഞുരുണ്ട,
അധിനിവേശത്തിന്നു് പുത്തന്മുഖം
വശ്യമനോജ്ഞമാം തൂമന്തഹാസത്തില്‍
വജ്ജൃനഖദംഷ്ട്രായുധങ്ങള്‍!
വേദനിപ്പിക്കാതെ കാതുകുത്തുംപോലെ,
നാമറിയാതെ നമ്മെ ഭരിക്കും,
നമ്മള്‍തന്‍ ഉണ്‍മയെ, നന്മയെ,
നീതിയെ, സ്വപ്നമോഹങ്ങളേ,
പത്മവ്യൂഹത്താല്‍ ബന്ധിച്ചിടും മുന്‍പു്
കണ്‍‌തുറന്നീടുക കാണുക.
പാരതന്ത്ര്യത്തിന്റെ ബന്ധനം ഭേദിച്ചു്,
സ്വാതന്ത്ര്യവീഥിയില്‍ സഹചരിച്ചീടുക.

pdf version: pdf
odt version: odt
ogg vorbis audio : OGG

കൈയ്യേറ്റം

Pdf version:  kaiyettam

Odt Version: kaiyettam

സഭാതലത്തിന്റകത്തളമത്രയും
സാമാജികരാല്‍ നിറഞ്ഞിരുന്നു

സന്തോഷനിര്‍ഭരം അന്തരീക്ഷം

അതിന്നല്ലോ ഈശനെ ‘ഇംപീച്ച് ‘ ചെയ്‌വു?

അദ്ധ്യക്ഷനാരാഞ്ഞു, ദൈവമേ

നിങ്ങളീയണ്ഡകടാഹത്തിനധീശനാണോ?

കൈവശമാണോ, കരം കൊടുക്കാറുണ്ടോ?

കാണമാണോ അതോ ജന്മമാണോ?

കൈയ്യേറ്റമല്ലല്ലോ, പട്ടയമില്ലല്ലേ?

പിന്നെങ്ങിനെ കൈവന്നതീ പ്രപഞ്ചം

അശരീരി വന്നു,

“മനുഷ്യാ, അദൃശ്യന്‍ ഞാന്‍

അനംഗന്‍, അനശ്വരന്‍, ആദിമൂലം

ചൈതന്യ തേജസ്സായി നിന്നിലുമുണ്ടുഞാന്‍

സദാ സര്‍വ്വചരാചരത്തിലും!

സുന്ദരകളേബരാ, നിങ്ങള്‍ക്കു നല്കി ഞാന്‍

കണ്ണുകള്‍, കാതുകള്‍, ഘ്രാണസ്പര്‍ശ്ശാദികള്‍

ജിഹ്വകള്‍, വാക്കുകള്‍, സ്വപ്നങ്ങളോര്‍മ്മകള്‍

ഭാവനാ സമ്പുഷ്ടമായ ചിന്ത.

സൃഷ്ടിയില്‍ ശ്രേഷ്ഠരായി നിങ്ങളേ കണ്ടു ഞാന്‍

ആശിച്ചു, എന്നെ തിരിച്ചറിയും നിങ്ങള്‍,

നിന്‍ ഹൃദന്തത്തിലെ എന്‍ തിരിനാളത്താല്‍

എന്നിലേയ്ക്കുയരുവാന്‍ എന്നില്‍ ലയിക്കുവാന്‍

തന്നു ഞാന്‍ നിങ്ങള്‍ക്കു ജിജ്ഞാസ തൃഷ്ണകള്‍

കണ്ടു പഠിക്കാന്‍ എളുതല്ലാത്തവര്‍ക്കായി തീര്‍ത്തു

ഞാന്‍ തീക്ഷ്ണമാമനുഭവ വിദ്യകള്‍

എത്രമേല്‍ കഷ്ടം ! മനുഷ്യാ നീ

എന്നിലേയ്ക്കുയരുന്നതില്ലതോ പോകട്ടെ

എന്നെയും കൂടി മനുഷ്യനാക്കുന്നു നീ!?

ഇല്ല പകയില്ല വിദ്വേഷമില്ലൊട്ടുമേ

എനിക്കെങ്ങനെന്നെ തമസ്കരിക്കാം

സൃഷ്ടി വൈശിഷ്ട്യം, സമ്പൂര്‍ണ്ണമാണതില്‍

സംശയത്തിന്നോരു സ്ഥാനമില്ല

ഉണരുവിന്‍, ഉയരുവിന്‍ ഉല്‍കൃഷ്ടമായോരു

ജന്മമുത്സാഹ തിമിര്‍പ്പിലാഴ്ത്തിന്‍

ഉത്സവമാക്കു മനോഹര ജീവിതം

പ്രേമത്താല്‍ ഉത്തുംഗ ശൃംഗമേറൂ“

അശരീരി നിന്നു, സഭാതലം മൂകമായി

സാമാജികര്‍ സ്തബ്ധരായിരുന്നു

അന്യോന്യം അംഗങ്ങളന്വേഷിച്ചിപ്പോള്‍

“നീ എന്തെങ്കിലും ഒന്നു കേട്ടിരുന്നോ?”

കവിത കേള്‍ക്കു…

Problem with Audio Player? here is the direct download link http://www.archive.org/download/kaiyyettam/kaiyyettam.ogg

ചൈതന്യം

pdf version: chaithanyam

odt version: chaithanyam

ചിരിക്കുന്ന പൂവും  പരക്കും നിലാവും

ഉദിക്കുന്നസൂര്യന്‍  തിളയ്ക്കും വെയിലും

ചിരിക്കും കുരുന്നും  തണുക്കുന്ന മഞ്ഞും

മയങ്ങുന്ന സന്ധ്യ  പിടയ്ക്കുന്ന പ്രാണന്‍

അലറിടും കടലില്‍  അലിയുന്ന പുഴയും

മിടിക്കുന്നഹൃത്തില്‍  തുടിക്കുന്ന ജീവന്‍

കലങ്ങും മനസ്സിന്റെ കാലുഷ്യവര്‍ഷം

കുലംകുത്തിയൊഴുകുന്നൊരോര്‍മ്മ പ്രവാഹം

ഇളുകുന്ന കാറ്റില്‍, മ‌രത്തിന്റെ കൊമ്പില്‍,

ചിലക്കുന്ന നാദം മുഴക്കുന്ന മന്ത്രം

ഈ വിശ്വ ചൈതന്യ വൈവിദ്ധ്യ ദൃശ്യം

Problem with audio player? Here is the direct download link http://www.archive.org/download/kaiyyettam/chaithanyam.ogg

സര്‍ഗ്ഗ സംഗീതം – ആലാപനം

വയലാറിന്റെ സര്‍ഗ്ഗ സംഗീതം എന്ന കവിതയിലെ ചില വരികള്‍

Problem with Audio Player? here is the direct download link http://www.swathanthran.in/Sargga-Sangeetham.ogg

സ്വാതന്ത്ര്യം

സ്വാതന്ത്ര്യപ്പൊരുള്‍  തേടിയലഞ്ഞു,

എത്തീ തടവറയില്‍..
ഈ ജന്മത്തിലെ മായക്കാഴ്ചകള്‍
മുജ്ജന്മാര്‍ജ്ജിതമാണത്രെ!
അച്ഛനുമമ്മയുമാര്‍ജ്ജിതമറിവും,
ഇടപെടലുകളും വെളിപാടുകളും,
കാണാക്കയറാല്‍ ബന്ധിച്ചെന്നേ
തള്ളീ മനസ്സിന്‍ തടവറയില്‍…
ആ തടവറ തന്നുടെ അലകും പിടിയും
പൊള്ളിച്ചുമാറ്റാന്‍, ഉടച്ചുവാര്‍ക്കാന്‍,
ഞാനശക്തന്‍ ! അസ്വതന്ത്രന്‍!
മായക്കാഴ്ചകള്‍ മുജ്ജന്മാര്‍ജ്ജിതമാണത്രെ!
എന്നുടെ ഹൃത്താം കാരാഗ്രഹ മതില്‍
ഭേദിച്ചനന്ത വിഹായസ്സിന്റെ
അപരിമിതാനുപമ സ്വാതന്ത്ര്യത്തെ
മതിവരുവോളം മുകരാനാമോ?
ആനന്തക്കടല്‍ നീന്താനാമോ?!

കവിത കേള്‍ക്കു

Problem with audio player? here is the direct link http://www.swathanthran.in/swathanthryam.ogg

എന്നെ അറിയുമോ?

ആരു ഞാന്‍,
എന്‍ ഹൃദയ വാദ്യലയം
ഉതിര്‍ത്തും ഊര്‍ജ്ജമേതു്,
എന്‍മനസ്സിന്റെ മതില്‍ക്കെട്ടില്‍
ഓര്‍മ്മകള്‍തന്‍ പ്രദക്ഷിണ വഴികള്‍ തീര്‍ക്കും,
ദേവനാരു്?
എന്റെ ഉണ്മയിലൂറി വന്നോരറിവു്,
- എനിക്കെന്നെ അറിയില്ല!

കാലമെത്ര കഴിഞ്ഞു പൂരുഷ-
ജന്മമെത്ര കഴിഞ്ഞു ഭൂവില്‍
ഐതിഹാസിക വേദസംഹിത,
ഉപനിഷത്തുകള്‍, ജനപഥങ്ങള്‍,
അശ്വമേധം, ദിഗ്ജയങ്ങള്‍,
ആറ്റംബോംബുകള്‍, ചന്ദ്രയാത്രകള്‍,
വിജയഭേരികള്‍………
“എവിടെ നിന്നു വരുന്നു നീ
എവിടേക്കു പോണു നീ “
എന്റെ ഉണ്മയിലൂറി വന്നോരറിവു്
- എനിക്കെന്നെ അറിയില്ല!

എന്റെയുള്ളിലെ എന്നെയറിയാതെന്തു നേടിലും,
ദിഗ്ജയങ്ങളില്‍, വിജയഭേരിയില്‍,
അന്തരംഗം ഉതിര്‍ത്തിടുന്നൊരു
നേര്‍ത്ത ചോദ്യം, – ആരു ഞാന്‍?
എന്റെ ഉണ്മയിലൂറി വന്നോരറിവു്
- എനിക്കെന്നെ അറിയില്ല!

കവിത കേള്‍ക്കൂ…

Audio player not working? Here is the direct download link http://www.swathanthran.in/Enne-aRiyumo.ogg